Wednesday, October 25, 2006



بير يورغون مارال

ائي آقالار ! گلين تعريف ائيله ييم
گلدي جاوانليغين چاغي سوووشدو
داهي گؤرمه م اوتوردوغوم مجليسي
محبوبلرين ييغيناغي سوووشدو

پاييز اولار داغلار توتار دوماني
ايمداده ايسته ره م شاه ـ ي مردان'ي
بولبول باخدي خزان گؤردو گولشني
آغلايا ـ آغلايا باغي سوووشدو

دييارلاردا دولانارديم ماه ـ ي سال
بيلمه زيديم زاوالا يئته ر كمال
يايلاغيندان قالخدي بير يورغون مارال
گؤزوم باخا ـ باخا داغي سوووشدو

ظاليم فلك قويماز من توتام قرار
ايستيره م دونيادان ائيله يه م فرار
" ريضا " دئيه ر : ناموناسيب روزيگار
دولدوروب جاميمه آغي سوووشدو



حئييف !

ائي آقالار ! مووسوم گلدي يئتيشدي
داغيلدي بولبوللر ، گولزاريم حئييف !
آلان آلدي ، ساتان ساتدي سوووشدو
باغلاندي دوككانيم ، بازاريم حئييف !

بيرجه باخين نغمه لرده نوايا
آه-ي ناله م چولغاشيبدير هوايا
حئييف درديم يئتيرمه ديم دوايا
هئيچ طبيب بيلمه دي آزاريم حئييف !

گئجه ـ گوندوز آرتار منيم آزاريم
داهي دوشمه ز دوست يولونا گوذاريم
هر كيمه باغلاديم لوطف – ي نظريم
هئيچ كيمسه بيلمه دي نظريم حئييف !

باخين گؤرون بو فلكين ايشيني
هئيچ قارداش تانيمير اؤز قارداشيني
كيمسه نه م يوخ ييغا قبريم داشيني
" ريضا " دئيه ر : ايته ر مَزاريم حئييف !




شش درـ ي جَفري آچديم اوزومه

بير آللاه'ي ، ايككي بيله ن كافيردير
يقينيمدير ، اوچ بيلميره م ابدا
دؤرد كيتاب اوخودوم معناسين بيلديم
بئيش وقتده نامازيم ائيله ره م ادا

شش درـ ي جَفري آچديم اوزومه
يئددي دريا خوش گؤروندو گؤزومه
سككيز وئرديم ، دوققوز آلديم اؤزومه
اون يئرده جانيمي ائيله ره م فدا

ييرمي'ده يئريديم ، اوتتوز'دا دوردوم
قيرخ ، اللي ، آلتميشي ، يئتميش'ه ووردوم
سكسن'ي ، دوقسان'ي ، بير گؤزده گؤردوم
ايككي يوز'ه بئل باغلامام ابدا

اوچ يوز'و ، دؤرد يوز'و ائيله ديم ازبر
بئيش يوز'ه چاتاندا اولدوم موكددر
آلتي يوز'ده باغلانيب بناـ يي بشر
يئددي يوز'ده نيدا گلدي صمدا

سككيز يوز'ده باغ ـ ي جننت آچيلدي
دوققوز يوز'ده نور ـ ي نئعمت ساچيلدي
" ريضا "دئيه ر نئچچه دؤوران گئچيلدي
بير'دن اون'ا ، اون'دن يوز'ه مين ادا